Ялшăн пăшăрханаççĕ
Ялта кирлĕ профессисен сумлăхне ӳстермелле, ял пурнăçĕн паха енĕсене массăллă информаци хатĕрĕсенче ытларах кăтартмалла. Ку çитĕнекен ăрăва ялсене илĕртме пулăшасса шанаççĕ Чăваш Ен агропромышленность тытăмĕн ветеранĕсем. Хăйсен пăшăрханăвĕсене вĕсем Республика ертӳçипе Олег Николаевпа сӳтсе яврĕç. Ялсенче пурăнакансен хисепĕ çулсерен чакса пырать. Шкултан вĕренсе тухсан яшсемпе хĕрсем пĕлӳ илме çĕршыври тĕрлĕ хуласене çула тухаççĕ. Вĕсенчен ытларахăшĕ тăван тăрăха каялла таврăнмасть. Ялсенче аслă ăрури çынсем кăна кун кунлаççĕ тесен те йăнăш пулмĕ. Çамрăксем яла килменни чылай çивĕч ыйту çуратать. Сăмахран, ял хуçалăх тытăмĕнче специалистсем çитменни. Хăйсен пуян опытне агромышленность тытăмĕн ветеранĕсем çамрăк ăрăва ăша хывасшăн, анчах та ĕçе тăсакан никам та çук. «Çитĕнекен ăрăва ачаранпах çĕр ĕçне хăнăхтармалла, ялта кирлĕ тĕрлĕ профессисемпе кăсăклантармалла», – палăртаççĕ вĕсем. Тепĕр канăçсăрлантаракан ыйту ялсенче пурăнакансем ĕçлеменнипе çыхăннă. ВАСИЛИЙ ШАДРИКОВ: «Ял халăхĕн пĕр пайĕ япăхланса пырать. Ĕç пур çинче çынсем ĕçлесшĕн мар. Вĕсем патшалăх пулăшăвне хăнăхнă. Çавăнпа пурăнаççĕ те. Çулсем, кăвак çулăм, çутă, инфратытăм объекчĕсем, цифра хатĕрĕсем – ялта пурте пур. Савăнса анчах пурăнмалла». Ял хуçалăхĕнче туса илнĕ паха апат-çимĕçе тепĕр чухне сутма та май çук. Лавккасенчи таварсем çĕр ĕçченне ура хурать. Агромышленность тытăмĕн ветеранĕсем 2020 çулта ирттернĕ тĕл пулу витĕмлĕ пулнине палăртаççĕ. Кăçалхи те çаплах пуласса иккеленмеççĕ вĕсем